Pilar Montoya // Euskara irakasle Santurtziko Udal Euskaltegiko autoikaskuntza zerbitzuan
Pasa den hilean, azterketak gainean, idazlanak egiteko "gairik" gabe geratu nintzen.
B1erako deskribatzaileen zerrenda hartu eta ikasleen gustuen/premien araberako hainbat fitxa sortu nituen. Zuek ere "gai" premian bazabiltzate, hemen dituzue proposamen batzuk, agian baliogarriak azken aste hauetan autoebaluazioa / ebaluazioa prozesuei aurre egiteko.
Gaur eta bihar futbola izango da mintzagai nagusia euskaltegietan; baina, beste bat behar baduzue hemen gaurko prestatu dudan fitxa.
Pasa den asteko fitxan ikasleen arteko lankidetzari erreparatu nahi nion; nola jarduten dute ezezagunak dituzten esaldiak edota hitzak entzutean? Gai dira mintzakidearen jarduna moztu eta argibideak eskatzeko? Gai al dira ulertzen ari direla adierazteko? Emaitza oso esanguratsua izan zen.
Maila baxua duten ikasleek horrelakoak esaten zituzten: "Me he perdido.", "Zer, zer?", "Ez dut ulertzen", "Zer da altxariak"...
Maila hobea zutenek: "Parte hori ez dut ulertu", "...saldu; baina zein gauzak?", "... irakasle, ikasle, alumnos? nola esaten da?".
Eta maila altukoek zuzenean entzuleari eskatzen zioten feedbacka, ulermena errazteko teknikak erabiltzen zituzten: "Badakizu zer den, ezta?", "Bulegoan edo despatxoan..."
Nik uste ikasleek ondo pasatu zutela, probatu nahi baduzue, hemen utziko dizuet.
Astean behin elkartzen naiz B1mailako ikasleekin mintzasaio bat burutzeko; arratsaldeko zazpietan. Inoiz ez dakit zenbat etorriko diren, guztiak dira pertsona helduak, langileak, familiaren ardura dutenak... baina, batez beste, zortzi lagun biltzen dira; hamar ere etorri ohi dira; baina futbol partida dagoenean bostekin konformatu behar.
Ohituta nago ikasle bakar bati eskolak ematen, autoikaskuntzaren patua, eta horrelako talde polit bat sortzen denean, zortzi, hamar lagunekoa "zer edo zer" egiten jartzeko gogoa pizten zait. Aste honetan "epaimahiak" sortu ditut taldekideen hiztegi maila neurtzeko. Gure helburua hauxe izan da: Hiztegi nahikoa dut egoki jarduteko esate baterako zaletasunez, gustuko gauzez...
Jarduera 8. fitxan ikusi ahal duzue.
(download)
Bi baldintza horiek aintzat hartuz, bigarren eskuko gauzak saldu eta erostea ideia ona den galdetu diet ikasleei. Eta taldeka jardun behar izan dute ariketa burutzearren. Ondo atera zait. Espero dut zuei ere baliagarria suertatzea.
Bosgarren fitxan erabilitako deskribatzailea hartu dut berriro: Gai naiz nire erabakiak azaltzeko eta arrazoitzeko; baina oraingo honetan pixka bat gehiago eskat diet ikasleei: "Testua antolatzeko hitz eta esapide arruntak erabiliz." Lana taldeka egiteko prestatu dut.
Gaiak hitz egiteko ematen duela iruditu zait eta B2koekin ere erabili dut baina eginkizunaren zailtasun maila igota. Esper dut zuei ere ondo ateratzea.
"Gai naiz ados nagoela edo ez nagoela ados edukazioaz adierazteko" deskribatzailea hartu eta bakarrizketa ariketa proposatu diet ikasleei aste honetan.
Eginkizuna zera zen: udalari kexua bidaltzea. Horretarako udalak duen erantzungailuan, iradokin buzoi moduko horretan, mezua utzi behar zuten.
Hona hemen fitxa:
Deskribatzaileen zehaztapena ikasleen komunikazio gaitasuna areagotzeko erabiltzen dut; mailak dituen helburuak garatzen lagungarria egiten zaidalako.
Ikasleek lortu beharreko helburuak modu errazean ikusiko dituztelako itxaropena ere badut; eta, zeregin zehatz eta mugatuen bidez, benetako komunikazio egoerei heltzeko prestakuntza lana, trebatze lana eskaini nahi diet fitxa "erraz" hauen bidez.
Baina lan sinple honek zailtasun jakin bat du: porfolioak B1erako sei deskribatzaile aukeratu ditu Ahozko adierazpen atalean eta zazpi Elkarrizketaren atalean, besterik ez. Eta aukera hori ulergarria da Hizkuntza-biografia, ikaslearen beraren dokumentua den aldetik; ez da ikaslea zoratu behar gaitasun bat hamaika modu desberdinetan adierazteko gauza dela frogatuz.
Baina, ikaslearen ikuspegitik guztiz onuragarri dena, irakasleon ikuspegitik zailtasun bat omen da materialak disenaitzeko orduan. Hamairu "Gai naiz..." horiek trinkoegiak dira batzuetan eta irudimerari eragin behar zaio egoera erakargarriak bezain errealak aurkitu nahian.
Hemen aste honetan erabilitako fitxa, buelta eta aldaketa batzuk eman behar izan dizkiot; baina espero dut goian esandako baldintzak betetzea.
Elkarrizketan (hitz egitean) entzuleen erantzunak pisu handia du hizlariaren jardueran; besteen erantzunak jardunaren nolakotasuna zehaztuko baitu neurri handi batean.
Gaurko fitxan ikasleei eskatuko diegu hartu duten erabaki baten berri emateko, (kontakizunean segitzen dugu) baina ariketan pisu handia izango du entzulearen jarrerak, entzun ahala hizlariak kontatzen duenarekiko adostasuna, harridura, jakin-mina, elkartsuna... adierazi beharko dute taldekideek.
Eta hori egiteko baliabide gutxi izango dituzte seguru asko, esapide gutxi ezagutuko dituzte. Lan horri ekingo diogu beraz, zer erabaki duten entzuten hasi baino lehen.
